Kaluguran kung kalalawigan:
Pengaku ku pu kanita na “balang libung truck a daralan, libung singil ing mililista.” Kilub na mu pu ning 30 bulan, migit na lang kapitnang bilyun a pesus ding apalub tamu Kapitolyu at lampas lang P180M kareti ding binalik tamu anting quarry shares karing munisipiu at barangay.
Sinabi ku kanita na “balang buwis a lungub, serbisyung lumual.” Kulang la mu pu king P500M ding mengagawang proyektung pang-imprastraktura karing miyayaliwang balen. Mengaku ku at gewa tamu pin “malinis ing gawa, alang porsyentong mebulsa.”
Malinis la ring meging kontrata ning gobyernu tamu. Balang linear meter a sadia nang apapagawang dalan ning gobyernu, adua pung linear meters a sementadung dalan, ustu king sukad at kapal king parehung alaga, ing apayari tamu uling alang komisyon o SOP. Mumuling 50% ing atipid ning gobyernu lalam ning kekatamung pamanungkulan.
Libutad na pu ning kapagnasan dang itipa ra ku king luklukan ning upaya kapamilatan ning RECOUNT at RECALL kambe ning masugid dang pamangampanya ban siran da ku pangatau, migtagumpe ya pa murin ing kekayung talasuyu para gampanan ing keyang mandatu – ing linisan ya ing Kapitolyu king katiwalian.
Mas marakal la pa sanang kasuyuan ding miras kekayu nung e la mebinbin at mipayalian ding aliwa pang programang mamalagang P367.31M a inapag ku king Sangguniang Panlalawigan a panimunan nang Vice-Gov. Yeng Guiao.
Kapamilatan ning Pamisaupan Caravan, midala ing serbisyu ning Kapitolyu karing pekaliblib a baryu ning lalawigan. Ing daing da ring pakakalulu e mu miyatad Kapitolyu. Pekikuanan ta ya pang dela mismu ing Kapitolyu karing pakakalulu.
E pu kumulang king P286M ing midalang kasuyuan king larangan ning kalusugan, edukasyun, agri at akwakultura ampon kabiayan. Mitatag ne pu ing Pampanga Development Council at aliwa pang councils bilang patune ning pengaku tamung “konsultasyun at partisipasyun.” Mitatag ya rin pu ing Arts, Culture and Tourism Office ban keta “pasulungan ta’ ya ing kulturang Kapampangan” anti ning pengaku ku.
Pengaku ku ing “papagaral la ring estudyanteng mangailangan.” Kulang la mu pu king apulung libung magaral king kolehiyu ring tinanggap saup-pinansyal a minabut P49.43M.
Ginawa tamung “tune obra at e mu mangobra” ampon “kabiayan karing pakakalulu.” Miras ing P10.56M “saup pinansya” karing 2,112 “mangalating negosyu” lalam ning ABE-K program kabang 25,558 lang katau ring miyantabayanan king pamanintun dang obra.
King pamagtagumpe tamu iniang 2007, “mibalik ing dangalan ning Kapampangan.” Pengaku ku pu ing “pamanimuna kapamilatan ning mayap a alimbawa” at iti gimpanan tamung mipnung kapakumbaban kilub ning 3 banua tamung pamamuntukan.
King daratang pung May 10, 2010 ing pagkalub yu pung maulagang botu kanaku, kang Marco Lazatin at sablang kayabe ku king Cruzada at Liberal Party mandatu yang pasibayu ban misundu ing mayap a pamanungkulan king mal tamung lalawigan. Dakal pa pu ing tagimpan ming abe-abe para king Indung Kapampangan.
Pakiisip ke ing Pampanga.
Kabalen, ika man sana.
Salamat pu.